منتديات أنا شيعـي العالمية - حوار بين التفكة والقلم

بعدما طغت لغة السلاح على خارطة العراق .. لم يبق الا دهاء القلم الوطني لمواجهة البندقية الحمقاء

تفكة وي القلم داير حوار طويل

وخارطة الوطن يمهم امعلكيهة

هاي تدك رصاص وهاذة يكتب دار

كلما كتب دار الطلقة تمحييييهة

خارطة الوطن كد ما ثقبهة رصاص

تكدر من كفاها تعاين اعليهة

تكلّة التفكة آنة الما يقطني الحيف

آنة العالسواتر كتب سركيهة

آنة المنك افضل ما ادنك راس

بس اعل الجثث لو ضل نفس بيهة

فضلي اعل الوطن لا ما تعدّة ارقام

فنّك يالقلم رمياتي تحصيهة !

ماحشرت طلقتي عل الحدود ابليل

(اذا الوحوش حشرت) نص لياليهة

ماخليت غيمة اتمر علي بيضاء

اذا ماي امطرت امطرت امطر دم عليهة

شجابك يلقلم لفعالي وينك وين؟؟؟؟؟؟

روحك يلقلم مابيك تحميهة

كاللهة القلم ياأيها الحمقااااء

كومي امن الخريطة احركتي اهاليهة

افضل مني بيمن ياسواتر هاي؟؟

من حرب الحرب ناسج دفنتيهة

انتي ارصاص بيج وآنة بية ارصاص!

بس شوفي الفرق مابينا اعليهة

هاي الخارطة برصاصج اهي اتموت

بس آنة برصاصي الخارطة احييهة

صح امن العدة تحميهة بس مرات

خارطة الوطن عالنار تحميهة

آنة الجار خط الجار خط اوياي

وانتي الجار خطة اعليه وضعتيهة

ماضل عالوطن جيران اليسلمون

لأن كلهة بحضرتج عايبة ايديهة

آنة اسحب ولدهم لدّراسة اقسام

وانتي اعليهم اقسامج تسحبيهة

وعمري شما اكحل عيون عدبغداد

دخان الرصاص البيج يعميهة

ابوشيهة ابورد بس انتي بوشج جاب

بوش امريكا ليهة ويغتصب بيهة

يتقدم نعم بيّة الوطن كدام

بس يرجع قرن كل صلية تصليهة

كالت له الخريطة (التفكة طرشة ذان

تحجيلك فقط بس لا تحاجيهة)

خالدالسعد