[احمد العراقي]

عراقيين

حفنه اسنين مرت ما بره المجروح
ولامره ابحلم متضمد اصوابه

ولا مره الفرح خيّم على المهضوم
مجفي وما يريد ايوجّر ابّابه

يفر بينه العمر واحنه اعله نفس الحال
وعيب الـ بالبشر محد حجه وعابه

عجيب اعله الضماير ليش ساد الخوف
وعليها اشلون كلفه ايسلط احرابه

گبل عالسيف نحجي ان راد لحظة يريض
هسه انگول خله ايواسد اگرابه

الليالي اتغيرت و انعگر ساگ الزود
وغده ذيل الرذيلة الوادم اتهابه

الوكت مگلوب جره انريد يعدل يوم
او يهوّد ما يمرنه ابجهرة اغرابه

نحسب خير نلگه وبلجي نعثر بيه
خلصنه وما عرفنا الفالح احسابه

مشينه اعله الجمر ما خفنه متحفين
تعرفه اگولبنه من اسنين عطّابه

صبرنه وما جزعنه وگلنه ضيم اليوم
ما ممكن يدوم .. وتنتهي اسبابه

ومشه مركب صبرنه ودار بيه الموج
ابحر محد يگدره وعالي خنيابه

ركبنه وگلنه نعبر رغم خشم الموج
حلم نوصل جرفنه ونلثم اترابه

وصلنه ومن گعدنه انشوف وجه الزيف
اجه امگبع علينه وتحرسه اجلابه

ضحك واحنه التعب ما خله حيل انگول
لحگنه الـ هالمجان اشلون واشجابه

سكتنه ولن جرفنه من البشر مهجور
وعلى اطرافه اليتيمة امجلجلة اذيابه

تحيرنه وشدهنه ابعسره هذا الحال
يا حل النرهمه ابهاي الطلابه

تحاورنه وطلعنه ابمخلص احجايات
تعلل هالوضع واتوضح اسبابه

عراقيين احنه وفرض حصن الضيم
نتشلبه اعله سوره ونقتلع بابه

اتفقنه من الجرف لازم يشيل الزيف
وكل صل اليسمنه انكسّر انيابه

لان گصة الجرف مخطوط بيها اعراق
ويا عظم العراق ابهمة احبابه