[*أحمد الكعبي*]

انه الطفله اليتيمه الدمعي شلال
أنه الونيت سكته أبكومة أصياح
لميـــت الــشماته أبــأه وبـــنوح
وخيرهم عليه من الضحك طاح

***

من دمع اليتامه فصلت عنوان
وخيطت القوافي بلوعة الحسره
وأحروف القصيده طرزتهه ألوان
بس ثوب الحزن لايگ عله الفقره
يالــغثيتهم لاتنـــفخ الـــدخان
من طبع اليتامه أدموعهم حمره
ربك وصه بيهم حته بالقرآن
وأنته أبلا خجل من الله تحتقره
شوكت يصحه الضمير العايش بطغيان
من هاي المواقف ياخذ العبره
همه الأبرياء وأنتم بني سفيان
غير الطيب اصله يعتلي بقدره
أكو ناس أصبحوا في عالم النسيان
أذكّركم عسى أن تنفع الذكرى
من ظيم العليهم لبسوا الچوبان
لبس أهل الترافه ضيعوا سعره
هذا أبن التعرفه سائر البلدان
يعني ابن العراق المحد ايدگره
خل روحك تنام بحظن کل جوعان
البين أعيونه شايل مو دمع جمره
موگد عينه ضل من يشتعل نيران
من تزهك دمعته الموگد أيطشره
من دم ولحم مخلوق هذا أنسان
والغرگان يگدر چفك أيجره
صير ألهم أبو ياهيبت الديوان
والمكسور خاطر لازم أتجبره
تره أحساس اليتيم أيدفي كل بردان
ظل ياکل أبروحه وعينه عالسفره
لأن شكلك صنم ماتقره سر أنسان!
بس المثل حيدر يگدر أيفسره.


تمنيت الدمع ينشف ويرون
أعيوني لحيدر أعرضهه ويرون
قراهه وفسر أهمومي وير ون
وعرفت الطيبه عد حامي الحميه

أحمد الكعبي.