منتديات أنا شيعـي العالمية - المدرسه إتنوح ( دارمي في إستشهاد الأمام الصادق عليه السلام )

بسم الله الرحمن الرحيم
اللهم صل على محمد وآل محمد وعجل فرجهم

المدرسه إتنوح ( دارمي في إستشهاد الأمام الصادق عليه السلام )
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ
ياجعفريّه اليوم جعفركم إيروح === طلاّبَه نادت آه والمدرسه إتنوح
ـــــ
طلاّبَــه نـادت آه جعفر ولينه == غيره إو شهامه إو زرد ينضح جبينه
واجب علينه إنروح لأرض المدينـه == ننصـــب عزانه إهناك نفديها للروح
ــــ
نُنصب عزانه إهناك يم جدّه أحمد == نهتــــف يهادي الناس جعفرنه أبْعَد
فارﮔنه ماي العين ديوانه إنســد == نـاح العلم مهموم والحسره مَتْروح
ـــــــ
ناح العلم مهموم وأعلن حــداده == ينعَه الولي المسموم ينشر سواده
وإيعزّي إم إحسين وأهـــل الريـــاده == وإيعزّي حامي الجار وإينادي مجروح
ـــــ
وإنعزّي حامي الجار وأهل الحميّه == وإنعـــزّي موســـى الخير بالكاظميّه
نلعن بني العبــــاس والناصبيّـــه == وإنشارك المُختار بالحسره والنوح
ــــ
وإنشارك المُختار بالدمعـــه والآه == جعفر أبو الخيرات منْهاجَه نِهْواه
باني العلم وإنطــــاه مولانـــه معنـــاه == أسّس مدارس صار منها الضوَه إيلوح
ـــــ
أسّس مدارس خير جعفر إمامي == كشفـــت ظلام الناس بيها هيامي
للصادق المسموم حبّي إو سلامي == وإبكربلــه الآهـــات تهتف يمذبوح
ـــــــ
وإبكربله الآهــــات ما تنتهــي دوم == يم الشهيد إحسين وإبحضرته إتحوم
تندب يبو السجاد إشفع يمظلـوم == والشيعي يوم الفوز بمْحبّتَه إيبوح
ـ
والشيعي يوم الفوز ينظر للحسين == هُــوّ الشفيع إهناك تنظرله كُل عين
والصادق الموسوم يوفيلك الدين == ياشيعي بس إنخاه للزاهره إتروح
ــــــــــــــــــــــــــــــــــــــــــــــــــ ـــــــــــــــــــــــ
مع تحيات شاعر اهل البيت / جابر النجفي
إسمعوا القصيده على هذا الرابط
http://www.wlidk.net/dldqjn84978.mp3.htm