[عباس طريم]

عباس طريم

طريم كالهه من الاربعينات
________________
الشاعر : عباس طريم

طريم كالهه من الاربعينات
متوكل خبز بوية
الثقافة

اذا بالسوك تتسوك اطميطات
وتطي اكتاب , متحصل
اصرافه

افلحو الكاع ,اسرحو بالنعيجات
بيعو اصخول وي عمكم
اعذافه

روحو للنهر , صيدو اسميجات
اتعلمو اخياطة واتعلمو
الندافه

والنسوان تكعد جالحمامات
الطبخ مسموح الهن ,
والحفافه

ومسموح الهن ايخبزن اخبيزات
ويهتمن باعمال
النظافه

وبعد نص قرن ,وصلتنه الرسالات
وجدي اللي حجاه كل شخص
شافه

غدو طشار اصحاب الشهادات
وكل واحد اغراضه عله
اجتافه

مثل جندي المجهز بالمعدات
محضر جنطته , مشدد
لحافه

يغنون اعله ماضيهم حسافات
وبعد شتفيدهم هاي
الحسافه

حركتهم رموهه بالمقالات
والاخوان لحسوهه
الكنافه

الاديب اتشوفه وسط الاحتفالات
خفيف الجيب , بس حلو
القيافه

والفنان واليملك مهارات
يصرخ بالزمن يطلب
انصافه

الحجي شيفيد ..شتفيد الاشارات
وحجينه صار اشبه
بالخرافه

من فوك المجر نطلق بيانات
واليسمعونه .. بكرخ
ورصافه

القطار اتعده من يم بيتنه وفات
وكبرت بينه وبينه ,
المسافه

المن نشتكي الياهو .. حرامات
عمرنه ضاع بالغربة
وسافه

عمر بالخوف والهم والمعاناة
فرح ما شاف ,لو جلمة
طرافه

عمر محذوفه من عده المسرات
جن اجبال شايل عله
اجتافه

طريم صدك في كل النبؤات
كلامه ابحكمة اهل العقل
دافه

يوم الكال اتركوهه الكتابات
والاشعار , والفن ,
والصحافه

لان تقديرهم عند الحكومات
جليلين الحيه تاخذ
اضعافه

عباس طريم