[الــصــدري]

أنا الصليت جمعة بوكت الإعدام
وتطيح بيوت كل ما أصلي ركعة
وأنا المديت أصبعي بعين شيطان
علي كلمن يأشر يخفى أصبعه
أنا الجريت أيدي من اليبوسون
حنالي الشيعي راسه وكتله أرفعة
أنا السديت ساتر عالمساكين
أنا صدر العراق وصدري درعه
أنا الكل ما عندي دفعته للدين
بعد بس مقتدى وباجر ادفعه
أنا المتهوم ظلما بالأباطيل
أنا الخرس اللسن ضلت تلسعه
أنا الثلثين عمري بمترة مسجون
أنا الثلج الصبابة مبجي ضلعه
أنا البجيت سكان السماوات
أنا المهدي علي ضل يبجي دمعه
أنا الزارع بذرتي بتربة حسين
أنا الخلّف زلم صدريه زرعه
أنا تسميت قائد جيش الأموات
أنا الـ بس الجفن لابس يتبعه
أنا الخليت سكان المجرات
حسب فقه الفضاء تصلي جمعة
اجت كلها بصلاتي تزاحم اليوم
شجاكم أمس مو كلتو بدعه
أمس خوف وتغلس هسة مو خوف
كمت حتى الاثنين تصلي جمعة
أمس عدكم تقية ومحد يحوس
لو يمكم نبي يصفعونه صفعه
(( أمس مجلس عزاء محد علي قام ))
بل محد تجرأ يبجي دمعة
أمس دمي انجفة وما لمته الناس
أمس حتى الأرض خافت تبلعه
علي الأكبر أمس مو مصطفى الطاح
وعلي حتى الحسين بكلبه صدعه
أمس دمعة مؤمل صارت تراب
وعلى خدوده التراب لهسة طبعه
أمس ومن أول أمس يا مسلم يهون
أمس كوفة ونجف مابيهة طوعة
أمس تابوتي يمشي لوحدة عالكاع
أمس محد طلع منكم يشيعه
فتحتوا أبوابكم كد فتحة العين
وكسرتوا جناح كل نظرة التتبعه
دمنتوا على الظلم والظلمة والخوف
والموت البطيء المانسمعه
سبايا الناس جانت والدرب ليل
وانتو حلوك تنفخ وآني شمعة
أنوركم ردت بلكت تشوفون
بس أعمى الگلبنوري شينفعه
أنا نوري انخلق للعدهم عيون
للعدهم مواقف بيهة فزعة
للتقرا التقية ببابه عنوان
وإذا عالحق طلع بابه يشلعة
للروس التعلكت بالحياطين
للام العليهن سكته تنعة
للبيوت الانداست بالبساطيل
لدموع النثاية البيهة لوعة
للأطفال البجوا بأبواب السجون
وللشباج أطولهم ترفعه
للعدهم فكر للعدهم إيمان
للبس العدل والحق يتبعه
أنا ما أريد افرق صف الإسلام
بس ما أريد عالباطل اجمعه