[منذر الساعدي]

خربت دِنيتك مو ذيجه دنياك
حسين الساعدي




مو شَرط اليعرفك ينصح اوياك
ولا كل واحد ايضدك يغدرك!

يِصح منك إوبيك اشكثر اذاك!
إويصح شامت على الزله يعذرك

وإحذر من زَمانك لو تَحداك
يِخَليك أبأديك إتحَفر كَبرك

أنته الما حَرامي ابليل يِدناك !
تنباك الضهر وتحير بأمرك!

خربت دِنيتك مو ذيجه دنياك
بعد ضحكة الصاحب لا تِغرك

وأبد لتبيع سِرك لِلترجاك
ترى هوَ اليدك طبله ويشهرك!

ياهو الكالك حطني اعله يمناك
يمكن هذا أولهم يغدرك!!

صارت بس مصالح جيبلي وهاك
عله الماكو ولا واحد يِعَبرك

إذا متروس جيبك مَحله ملكاك
حتى الما تعرف اسمه يِمرك

وإذا فارغ يصير الدرب مناك
حتى اللي تعرفه ما ينظرك

أقرب ناس الك بالشده ينساك
وإذا ما ينفَعَك ! يمكن يِظرك!

صرت مكروه محد جاب طَرواك
لأن تحجي الصدك محد يقدرك!


الشاعر حسين الساعدي

منقوول

[*أحمد الكعبي*]

روووعه منذر تسلم الأيادي عالطرح الرائع