[احمد العراقي]

عظم الله تعالى اجورنا واجوركم بمصاب اربعينية الامام الحسين واهل بيته وانصاره صلوات الله وسلامه عليهم اجمعين

اجر الرسالة

ابحلگ الموت حط جدمه اليزور حسين
امولم عالشدايد ما رجف گلبه

يقضي للنبي اجر الرسالة يريد
ويجسّد بالزيارة امودة القربه

نفسه اليصعد وينزل يصيح حسين
مفطوم ابفطرته منّه شيسلبه

واذا حبه صليب ايصير يتلگاه
الف مره اعله حبه ايكيف ايصلبه

يدري مو ورد مزروع دربه اخطار
بس حسين امانه شنهي الـ ايرهبه

دمعه ما يوفي ايشوفه لاجل حسين
صار ابدربه دم المنحر ايسچبه

ابخجل گطرات دمه ابكربله امن اتطيح
زاير من حبيب اتناشد ايكتبه

من ينوي الزيارة تشب نار الشوگ
تهم نگلات جدمه وعالمشي اتلهبه

يشوف حسين وايدگ گلبه باسم حسين
يطلگ الكون ويهيم ابفلك حبه

ابسبيل الله يقينه من يحث ممشاه
وعند ام الحسن مضمون اجر تعبه

ابغبار ترابه يهفت كل لظى النيران
والله اعله جهنم حرّم اتعذبه

صعب طيف المناية ان يجس جفن الروح
وعنده شكد سهل لحسين ويرغبه

شرف عمره ابو اليمه والكرامة البيه
والحر ما يفرط بالشرف سبّه

ابغير حسين يا عاقل يود الموت
وروحه ابسيف خصمه ايشوفها امچلبه

اسم حسين اية صانت القران
وضمير الرضع وحيه اعله الطهر يربه

محراب الشهادة البيه يصلي النور
ولگصة المجد دمه انجعل تربه

بيوم الاربعين الحج مشي لحسين
يبيض الله جبينه وينغفر ذنبه

لذلك ما يهم الموت كلمن زار
قبلة حسين عنده ومنحره كعبه


احمد العتابي
العراقي

[رياض الرسل]

السلام عليكم


احمد العراقي الاصيل

كالعاده موفق ومسدد على هذه
القصيده الرائعه واسأل الله قبولها منك

والله الك وحشه

رياض الرسل

[احمد العراقي]

السلام عليكم
اخي العزيز رياض
شكرا لمرورك المبارك يا طيب
الظروف شغلتني عنكم
الله يسلمك اخي ويحفظك
تحياتي واحترامي لك

[ابوتكتم الخير]

بيوم الاربعين الحج مشي لحسين
يبيض الله جبينه وينغفر ذنبه

لذلك ما يهم الموت كلمن زار
قبلة حسين عنده ومنحره كعبه
أحمد العتاب مبدع
بارك الله بك على هذه الصور الرئعة
والكلام المبارك
جزاك الله خير جزاء
التوفيق دعائي